الواد محمود صاحبي هيبقى قاضي !
September 20, 2006محمود ده واحد صاحبي وزميلي في الكلية .
محمود واد سبرسجي ضايع وبايظ وبيشرب سجاير وحشيش وبيعاكس وبيسرّح شعره لقدام (!), وثقافته في الحضيض , واهتماماته ما فيهاش حاجة عليها القيمة , ومع ذلك مش عارف ليه محمود من أكتر الناس اللي بقعد معاهم لما أروح الكلية – ده إذا رحت أصلاً – .
المهم محمود سقط السنة اللي فاتت – اللي هيا سنة أولى – وبقى مطلوب منه يعيد السنة تاني .
محمود قرر إنه يحوّل لكلية حقوق .
- وإشمعنى حقوق يعني اللي هتنجح فيها ؟ يا ابني خليك زي ما إنت هتبقى خدت السنة في سنتين بدل ما تخش حقوق وتسقط برضه وتاخدها في 3 سنين !
محمود : أصل خالي مستشار , وقالي مالكش دعوة , خش إنت حقوق بس وأنا هدخلك القضاء !
يا دي النيلة !
واحد زي محمود يبقى قاضي ويحكم بين الناس ؟ بمناسبة إيه ؟
هيّ البلد دي بتمشي على قفاها ؟! دايماً تحط الراجل اللي مش مناسب خالص في المكان اللي مش مناسب خالص برضه 
؟
طبعاً لازم كل حاجة في البلد ( العزبة ) تمشي بالمقلوب , إذا كان حماة الوطن المكلفون بتنفيذ القانون و الحفاظ على حقوق المواطنين وأرواحهم يبدؤون حياتهم العملية في خدمة القانون والعدالة بجريمة رشوة يدفعون فيها خمسين ألف جنيه لقياداتهم في خدمة العدالة برضه عشان يدخلوا كلية الشرطة .
لما يبقى عندنا ضابط شرطة مجرم ومرتشي وقاضي زي محمود , لكم أن تتخيلوا شكل العدالة !
ولكم أن تتوقعواً ما سيحدث لكم إذا حاولتم اختراق خطوط العدو . . قصدي المرور من كمين الزعفرانة !!
