إلحق يا مصري آخر مظاهرة قبل إلغاء الجمهورية وإعلان مصر عزبة مباركية مستقلة
March 21, 2007
مش عايزين تعديل دستور .. عايزينك ترحل وتغور
يوم الاثنين فيه استفتاء على تعديل 34 مادة في الدستور المصري دستور بلدنا اللي بيقول البلد تمشي إزاي وبيحدد حق وواجب كل واحد فينا, التعديلات دي الحزب الوطني عملها بمعرفته .. تعديلات تفصيل على مقاس جمال بيه , عشان محدش يتكلم أو يعترض أو يطالب بحقه أو يرفع راسه , مش كدة وبس كلنا هنكون مهددين في الشارع وفي شغلنا وبيوتنا وأكل عيشنا .
تعديل المادة 179 بيدي الحق لأي أمين شرطة إنه يدخل بيتك ويفتشك ويراقبك ويراقب تيلفونك ويسجلك صوت وصورة ويحبسك وكل ده بمزاجه من غير إذن نيابة ولا دياولو وبعدين يوديك محكمة عسكرية لأنك إرهابي ؛ يعني مفيش حصانة لمحامي ولا صحفي ولا قاضي ؛ يعني مفيش عدل ولا صحافة ولا قانون , وكله بالدستور يا بيه !
أما بقى تعديل المادة 88 فده بيلغي الإشراف القضائي على الانتخابات ويسيبها للداخلية وبتوع " نعم نعم يا مبارك " يطلعوا النتيجة اللي هما عايزينها . التعديلات كمان هتمنع أي مستقل يترشح للرئاسة يعني انكتب علينا وعلى ولادنا رئيس من الحزب إياه لحد ما نموت , ورئيس الجمهورية بقى من حقه يحل مجلس الشعب من غيرحتى ما يستفتي الناس ؛ يعني احنا ننتخب مجلس شعب هو ييجي يحله من دماغة ويطلعلنا لسانه .
يعني من الآخر البلد هتبقى عزبة مبارك وولده , واحنا عبيد وأنفار عندهم مالناش حقوق وكتّر خير ناظر العزبة إنه سايبنا قاعدين .
احنا بقالنا كتير بنتكلم عن الحرية والديمقراطية وحقوق الإنسان والشفافية وتداول السلطة والنهب والفساد والقطارات والعبارات والسرطان والعنوسة والبطالة والفقر والجهل والمرض و عندنا استعداد نفضل نتكلم ونحاول تاني وتالت , بس التعديلات دي هتحرمنا حتى من أبسط حقوقنا كبني آدميين وهو حق الكلام والتعبير, الموضوع مش المعارضة والناس بتوع السياسة بس , الموضوع هيضرنا كلنا , أي حد هيفتح بقه دلوقتي ممكن يبقى إرهابي مفيش حرمة ليه ولا لبيته وعرضه وحريته وكرامته , من حقنا نكون زي كل شعوب الدنيا اللي واخدة حقها والحكام بيشتغلوا موظفين عندها , من حق ولادنا يعيشوا في مصر أحسن من اللي احنا عشنا فيها , كل واحد فينا هيجيله يوم يسأل نفسه أو ولاده هيسألوه كان فين يوم ما البلد اتباعت وبقت تكية لمبارك والعصابة اللي معاه ؟!
دي آخر فرصة نتكلم واحنا لسة بني آدمين نرفض الاستعباد والذل اللي عايزينا نعيش فيه , يمكن تكون دي آخر مرة نقدر ننزل الشارع فيها نعبر عن رأينا ما هو بعد كدة اللي هيتكلم هيبقى إرهابي .
يوم الأحد 253 الساعة 6 هنكون كلنا في ميدان التحرير , كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل الشارع ومش هنخاف ومش حنسيب بلدنا عشان احنا أصحابها .
شباب بيحلم ببكرة
جزى الله خيراً من أعان على نشرها يا رجالة
يا سيدي ربنا يستر على البلد دي
خلاص بقى
بس شكلها هتبقى شديدة عشان اخر واحده
ربنا يستر
تحياتي
http://al-ghareeb.blogspot.com/2007/03/blog-post_1866.html
Comment by عبدالرحمن عياش — March 21, 2007 @ 8:04 pm
ليس اقل من هبة شعبية يقوم بها على الاقل 5مليون خنوع من 80مليون خنوع اما اعداد المظاهرات التى يكون فيها كلاب رعب الدولة والرعب العام اكثر من المتظاهرين فينطبق على هذا الوضع المثل القائل (ايه تعمل الماشطة فى الوش العكر )بمعنى المهمومين بحال البلد يحاولون تحسين الاوضاع لكنهم قلة قليلة والمناهضين للمهمومين المسئولين عن بشاعة الاوضاع والشكل القبيح هم كثرة واكثر قوة فماذ تصنع الماشطة مع هؤلاء
لذا ليس اقل من 5مليون مصرى خانع
Comment by طليعة الاحتضار — March 22, 2007 @ 6:41 am
حدش شاف التعديل الدستورى عند الحاج أبو جمال
مفيش أطعم من كده ولا حلى من كده
اقرا نص التعديلات المقترحة
http://elezba.blogspot.com
دى التعديلات يا عالم
Comment by أبو جمال — March 22, 2007 @ 3:45 pm
انشاء الله ربنا يقوينا و نصمد ادام كلاب الامن
انا بجمع اكبر عدد من اصدقائي بس انا ليا طلب واحد و هو اننا نكون على اتصال كلنا مع بعض عشان نكون منظمين و كلنا نطلع ماً
ارجو الاتصلا بي على ايميلي او مدونتي
او حتى تديني رقم اي حد من منظمي كفايه
و ربنا يوفقنا و يترها لنشاء الله
Comment by يساري مصري — March 23, 2007 @ 2:28 pm
تحية لكل الشباب الرافض لأي شكل من أشكال القمع و هدر الحقوق
تضامني معكم من أجل غد أفضل و فضاء حر نظيف
لقد أذيع خبر اعتقال المدون أسد اليوم أرجو ان لا يكون الخبر صحيحا و إن كان صحيحا فأرجو أن يفرج عنه و عن كل المناضلين سريعا فلا وطن بدون أبناءه
تقبل تحيتي و تضامني
و ليتضامن جميع المدونون العرب في سبيل غد حر يستعيد فيه الانسان حقوقه كاملة
Comment by ركانة حمور — March 25, 2007 @ 5:20 pm
للاسف انا لم اعلم بموعد التظاهر وكان نفسى اكون معاكم بجسدى وروحى معا ولكن اقول لكم انا كنت معكم بروحى وقلبى ويا رب يا خد مبارك والحكومة كلها واحد واحد واشوف فيهم يوم يا قادر يا كريم وانا حاسس انة هايجى يوم هايقوم فية الشعب كلة مش واحد ولا اتنين وانا مستنى اليوم دة بفارغ الصبر
Comment by عمر المصرى — March 27, 2007 @ 2:13 am
جاك خابط ياد يا عرة منك له يا مدونين يا واطيين
هو فيه غير العالم المحترمة دى هى اللى تمسك البلد
اما عيال صحيح ولالكوش اى عازه
الحاج وكل حاج زيه هما اللى فاهمين وانتم ايه قولى ايه
حبه بقر وتيران الله فى البرسيم بتاع الحاج
عندنا فى عزبة أبو جمال بنعمل حاجات مش ولابد فى اللى يخبط فى سياسة الحاج انا مش فاهم هما سايبنكوم ليه يا غجر
Comment by أبو جمال — March 27, 2007 @ 2:33 pm
والله مدونه عظيمه واحييك يا اخى علي المجهود الرائع وادعوك لمشاهدة موقعي العظماء
www.nourhetler2006.jeeran.com
نور موقع العظماء
Comment by نور العظماء — March 29, 2007 @ 11:19 pm
مدونه عظيمه مجهود عظيم واتشرفت بالدخول علي هذة المدونه العظيمه انا نور موقع العظماء ادعوك لمشاهدة موقعي
www.nourhetler2006.jeeran.com
Comment by نور العظماء — March 29, 2007 @ 11:23 pm
v.i.
Comment by momy.mm — April 3, 2007 @ 10:39 am
هذا وباالله التوفيق سؤال الى رئيس شعب مش موجود شعب مات من زمان وباع القضيه الى رئيس جمهوريه اسف ليس جمهموريه بل ملكيه... ياااااه اسف ليس ملكيه بل عزبيه صح كده هى جمهوريه عزبيه مبارك لماذا تفعل ذالك بمصر يا ريس ..ليه بتعمل كده فى مصر يا ريس لييييييييييييييييييييه هو الشعب عملك ايه حرمته من الجنيه وجوعته وشعحته وحرمته حتى من كلمه لييييييه
الله يرحم شعبك يا مصر
Comment by سمير المصرى — May 1, 2007 @ 10:17 pm