فاصل شحن
April 10, 2007
بالأمس دفعت لسائقٍ عشرين جنيها وأصررت على أخذ ثلاثة وعشرين باقي العشرين التي دفعتها !
أرى في الطريق رجلاً فأقول لنفسي إنني أعرفه وأن العلاقة بيننا تحتم عليّ أن أسلم عليه . أذهب إليه فيعانقني ويسألني عن الأحوال والأخبار بينما أنظر له فاغراً فاي عاجزاً عن تذكر من يكون ! مالك يا عمر ؟ إنت كويس ؟ -مفيش حاجة أنا تمام زي الفل !
ويمضي الرجل وأنا لا أدري من هو !
أقف في انتظار تاكسي لأجد أحدهم في سيارة خاصة يشير إليّ أن اركب ؛ فأركب ولا أدري من هو لكنه يعرفني جيداً ويقول إنه سيوصلني إلى البيت , أقول في نفسي لعله قريب لنا وأطلب منه ألاّ يشق على نفسه وأن ينزلني في أقرب نقطة ولا يغير وجهته من أجلي فيجيبني بأنه أصلاً ذاهب لإرجاع السيارة !! لا أفهم ماذا يعني وأسكت . وأمام البيت أكتشف أنني كنت راكباً في سيارة أبي .
كل بضع ساعات أنتبه فجأة لأسأل نفسي أين أنا وما الذي جاء بي إلى هذا المكان والمفروض أعمل إيه دلوقتي ؟
التيرم اللي فات اشتريت الكتب ورميتها في البيت ومفتحتهاش إلا ليلة الامتحان -حرفيا- لا ذاكرت ولا حضرت محاضرات ولا عملت أبحاث وشيتات , و جيت في الامتحانات اشتغلت الدكاترة وسرحت بيهم على الورق , أبص ألاقي نفسي ناجح وجايب تقديرات !
ساعات بحس إني متعمد أعمل كدة : بقلل استغلال موارد العقل والذاكرة وباستخدم الحد الأدنى منها عشان البلد دي سقفها كدة و خسارة فيها تشتغل بأكتر من الحد الأدنى.لو اشتغلت بجد يبقى باحرق في نفسي على الفاضي وبرمي موارد في الترعة.
بس بجد مش عارف أنا فاصل كدة ليه , مجرد حالة اكتئاب معتادة ولا ده بقى نمط حياة باشتغل بيه من غير ما آخد بالي ؟ هل المشكلة ممكن تتحل لو الواحد ريح نفسه خالص وخد أجازة رسمي من كل حاجة لفترة معينة ؟ رغم الكسل والتوهان والبطالة اللي أنا فيها دي مش عارف أستريح , حاسس دايما إن فيه مليون حاجة لازم أعملها وإني باسرق وقت وبهرب من مسئوليات .
حد فيكم عنده نفسه المشكلة دي وبالتالي ممكن تبقى حالة عامة ولا المشكلة عندي أنا لوحدي ؟
كل أيامي اللي فاتت كانت بتعدي كدة مع الفرق أني فعلاً ورابا حجات تتعمل و مش عاطلة و مش فاضية, بس مكنشي ليها طعم, متفهمش يابني ايه اللي حصل , صحيت امبارح ناوية أبقى مبسوطة,و مع اني بالأخص امبارح كان عندي مشاكل كتيرة بس ضربتها صارمة و انبسط
:)
كل سنة و انت طيب
Comment by قطر الندى — April 10, 2007 @ 8:33 am
عيل تايه يا ولاد الحلال
:D
“كل بضع ساعات أنتبه فجأة لأسأل نفسي أين أنا وما الذي جاء بي إلى هذا المكان والمفروض أعمل إيه دلوقتي ؟”
لا واضح انها بقت حالة عامة، متقلقش كلنا في الهم سوا
Comment by Mehrez — April 10, 2007 @ 3:01 pm
انا كنت فاكر انى انا الوحيد الى بيعمل كده
انا كنت فى الكلية مقضيها تماما
و مش عارف ليه انا دخلت الكلية
و لا نجحت ازاى
انا عارف انى فاشل تماما
و لكن بما انى فى مصر
فانا من اعظم الناجحين فى عملى
شكرا لأمى الحنوم
مصر
Comment by عباس العبد — April 10, 2007 @ 7:31 pm
نفس الحاله ياعمر
بس فيه فرق واحد
إني لحد دلوقتي لسه ما دفعتيش المصاريف
ولا جبت الكتب
بس بالمناسبة البلد دي مش محتاجه أدني جهد من إستخدام العقل
عايزه إستخدام الطاقه القصوي
لسببين الأول إنك لازم تستخدم الطاقه القسوي تلك في إذاحه النظام
والثانية إستخدام نفس القوه لتطوير نفسك وتطوير بلدك عشان نطورها وتبقي بتاعتنا إحنا مش بتاعت حد تاني
مش كل شويه هنقعد نشتري تكنولوجيا من بره وندفع إحنا وخلاص
Comment by ميت — April 10, 2007 @ 11:06 pm
أول حتة كانت بجدوللا هزار؟
عشان لو بحد يبقى بوادر زهايمر
الحق اتمتعلك يومين وانت فاكر!
اما الباقى فعادى انا ولا دفعت المصاريف وحصر فى المناسبات
يعنى هموت ناس وش
الى مطمنى ان اصحابى الى بيحضروا ولا يفرقوا عنى حاجة
من رأيى يخلوا الكلية منازل بلا وجع دماغ
Comment by Raghda — April 10, 2007 @ 11:19 pm
القول الحصر في تلخيص تكية مصر
http://wakeupandgo.blogspot.com/
Comment by Anonymous — April 11, 2007 @ 7:36 am
ممكن يا عم أسد تحط المدونة بتاعتي في الروابط أو اللينكات اللي عندك
شكرا
Comment by alzaher — April 11, 2007 @ 2:53 pm
ايه يا عم مالك . ليه حاسس انك لوحدك اللي فاصل شحن ، تقريبا كل الشعب المصري كدة ، كل الشعب حالته صعبة بما فيهم انا طبعا كمواطن .. سلامات يا مواطن ، بجد انا كمان بقيت مش بحضر محاضراتى ولا بجيب كتب و لا محاضرات ولا ورق و ادخل الامتحان يا بلطجة يا تأليف و العجيب يا اخي اني بجيب تقدير انا مش مضايقة اصل التعليم كله بتاع مصر مالوش لازمة و بيحاسب الطالب بالكيلو على اساس انه العليم بيكيل بالباتجان بس ما علينا و ادينا ماشيين .. مش لوحدك يعني
Comment by سارة نور الدين — April 12, 2007 @ 4:38 pm
يا عم خليه على الله البلد كله فصله شحن
Comment by ayman — July 3, 2007 @ 2:58 pm
أنا زيك ... و نفسي ألاقي حل لل أنا فيه .. نفسي أصلح حاجات كتيييير ماينفعش اصلحها لوحدي و ماعرفش ليه شايل همها... ما علينا.. نفسي مايجيش اليوم اللي أقول فيه زهقت منك يا مصر -مع إنها ملهاش ذنب.
-قناةالسويس عاملة 18 مليار دولار في 10 اشهر قريب... الفلوس دي بتروح فين؟؟؟؟
ســلام يا عم الواحد ليه حق يطق و يموت مش بس يزهق!
Comment by اسلام — December 14, 2007 @ 3:56 am