عاجل : عضو بكفاية يعتزم أكل سندوتش فول صباح اليوم !
May 27, 2007الصحافة المصرية حاجة تشرح القلب الحزين والله يا ولاد , في الأول
روز اليوسف :
والأهرام :
الامر الذي دفع د.خالد منتصر في مقال بالدستور إلى التساؤل عما كانت الأهرام ستفعله إذا كانت الأخت عضوة نشطة بلجنة السياسات مثلاً ؟!
والنهاردة المصري اليوم الغرّااااااااااااااء نشرت الخبر التالي :
حريق في مكتب عضو بحركة كفاية
شب حريق مساء أمس الأول، في مكتب عضو بحركة كفاية، تمكنت قوات الدفاع المدني من السيطرة علي الحريق، ورجحت أن يكون سببه ماسا كهربائيا في الجزء الخارجي بجهاز التكييف. تحرر محضر بالواقعة، وأخطرت النيابة التي قررت انتداب المعمل الجنائي لمعرفة سبب الحريق.
وقال محمد حافظ عطية «٥٢ سنة» مهندس معماري وعضو بحركة كفاية، إنه تلقي اتصالاً تليفونياً من حارس العمارة يبلغه بأن حريقاً شب داخل مكتبه الكائن بالعمارة رقم ٥١٣ امتداد شارع الأهرام، دلت التحريات علي أن الحريق وقع داخل مكتب المهندس وامتد لغرفة ملحقة به، ورجحت التحريات وقوع ماس كهربائي بجهاز التكييف.
هما أعضاء كفاية دول إيه ولمؤاخذة ؟ يندرجوا تحت أي تصنيف يعني ؟ مش مواطنين عاديين زيهم زي غيرهم يجري عليهم ما يجري على باقي البني آدمين ولا الشعب المصري ينقسم إلى بشر أسوياء , وأعضاء بحركة كفاية ؟
من فينا ليس عضو في نادي كذا وطالب بجامعة كذا وساكن في حي كذا وشغال في جهة كذا وعضو بجمعية البتاع من أجل المش عارف إيه وابن العائلة الفلانية ومنتمي للحزب العلاني ... إلخ
اشمعنى بقى هبل الصحافة المصرية ما بيظهرش إلا مع أعضاء كفاية ؟
ولأن الشيء بالشيء يُذكر شاهدوا مثلاً هذا الخبر المعجزة من صحيفة "عين " :
الجرايد دي مش لاقية حاجة تعملها ولا إيه ؟
صحافة صفراء لاأكثر ولا اقل
الحكومة تتبع اسلوب الاغتيال المعنوي لمعارضيها كما فعلت مع الاستاذ عبد العزيز مخيون عندما اطلقت عليه كلاب الصحافة تنهش عرضه
ولكن هيهات
Comment by Bella — May 27, 2007 @ 9:08 pm
الخبر بتاع عين دمه خفيف , بيتكلم عن كائنات فضائية غريبة
الأخبار بتاعة بنت عضو في حركة كفاية و كذا دي بقى اللي حقيرة فعلا
Comment by BlueRose — May 27, 2007 @ 10:26 pm
شعبي شعبي الحضارات يا جرايدنا القوميه
كله تجريح و تشهير في دولنا الأمنيه
أبقي قابلني في المقر الجديد في 7 شارع المريخ كوكب تورابورا
Comment by العميد ميت — May 27, 2007 @ 10:56 pm
وده تقرير تاني من الغراء برضه فيه معلومات مغلوطة وعبيطة عن حملة كلنا ليلى بس أهم حاجة آخر فقرة في التقرير :
الحمد لله ظهر الحق وأعلنتها الصحافة المهنية المستقلة ثقافتكن متواضعة يا بنات , هايفين يعني و آخركم تعملوا بيض بالبسطرمة وتتخانقوا على لون فستان هيفا اللي طلعت بيه في الكليب الجديد !!
المجد للمدونين الذكور !!
Comment by asad — May 28, 2007 @ 1:31 am
اخبارك باييتهه
الخبر بتاع المدونين دا قديييييييم
asad كتب/ت ..
وهو أنا قلت إنه حديث يا فالحة ؟
منا عارف إنه قديم من نوفمبر ألفين وستة تقريبا بس هو في نفس سياق الاستهبال الصحفي , أما مدونات قليلات الثقافة صحيح !!
Comment by shaimaa — May 28, 2007 @ 1:36 am
أسد بقولك إيه ، هوه عضو كفايه ده هيتقبض عليه علي كده ولا إيه النظام ، عشان نلحق بس نجيب له محامين ولا حاجه
وعاش كفاح المدونين الذكور
Comment by العميد ميت — May 28, 2007 @ 10:22 am
بس الفقرة دي مش عن ليلى يا أسد
دي عن قسم الأقلام النسائية في مكتوب
بس الكذب في الموضوع ان أغلب عضوات يوم ليلى من الخليج يطالبن بحقوق المراة المصرية
واضح ان أسامة المهدي دا كان محروق قوي من اليوم
قال ثقافتهن المتواضعة أمام الذكور قال
Comment by BlueRose — May 28, 2007 @ 10:42 am
وبتوع مكتوب سموها ليلى وخدوا الاسم من شخصية فاتن حمامة في فيلم الباب المفتوح برضه يا دكتورة ؟!
Comment by asad — May 28, 2007 @ 2:17 pm
النهاردة بقى المصري اليوم الغرااااااء نشرت تغطية لمظاهرة كفاية أمام نقابة الصحفيين في ذكرى انتهاكات 25 مايو 2005 واختطاف محمد الشرقاوي في نفس التاريخ من عام 2006 .
هذه هي الفقرة الأولى من التقرير الذي كتبه السيدان طارق صلاح ومحمود جاويش :
الصحفيات الشريفات وغيرهن ؛ من غير الشريفات يعني !!مين علم الناس دي عربي ؟! ما احنا تعليم حكومة برضه !!
Comment by asad — May 28, 2007 @ 2:23 pm
حاجة وسخة فعلا.
ووصلني من فترة صورة مقالة في روزاليوسف تتكلم عن الشابات اليساريات المنحرفات لأنهم بيروحوا المظاهرات بقمصان نص كم!
شدّ لي مكتوب لو عايزها تضمها للمجموعة.
بالصدفة باقرا دالوقت مقالة وائل عباس في واشنطن بوست بيتعرض فيها للمضايقات و القمع و اغتيال الشخصية ال بتلجأله الحكومة.
Comment by ألِف — May 28, 2007 @ 2:31 pm
ههههههه
طيب انا بسبق بس انا بشجع الترسانة عشان بيلبس تي شيرت لونه بينك
وعضو ناشط وامين حصالة في حركة 12 ربيع الاول
وكمان اصحابي تاح(اخوان) وزكي(يسار) والنديم(امين تنظيم سري، عمل انقلاب علي امين العالم)
انا بقولك الاول احسن بكرة يطلع خبر كدة ولا كدة.
اخس عليك يا اسد
لالا اخس عليك اخس بتتهم المدونات الاناث بالثكافة المتواضعة وبيتخانقواعلي لون فستان هيفا؟ اه يا مفتري يا ذكوري
ونسيت خناقاتهم علي تامر حسني
مش هسامحك ابدا علي دي
Comment by zenzana — May 28, 2007 @ 6:50 pm
ايه يا عم دة كله ناقص اكتبلك رقم البوكسر علشان احط تعليق
مع احترامى للى انت كاتبه كله
بس الخبر الاول البنت فعلا شكلها ما ينفعش الا يكون اداب و اللى يقول انى بشوه سمعة واحدة لا دى ما تنفعش تتشوه سمعتها اصلا دى تشوفه سمعة كتيبة بحالها
خبر المجونيين بتاع العين هوه اللى يمكن شاذ حبتين
اما حملة كلنا نسوان دى
فمن هيافتها ... لازم يتكتب عنها بالهيافة دى
!
Comment by GEMYHOoOD — May 28, 2007 @ 7:00 pm
هههههههه
لأ الاخيرة دي جامده طحن
بس يا باشا من امتى اساسا والصحافة بتاعتنا لها قيمة
حضرتك ممكن تقري العواميد اللى بتبقي فى اى جريدة وممكن تعرف مستوي الصحافة عندنا
اذا كان العتاولة نفسهم مبيعرفوش يكتبوا يبقي هتلوم الصحفيين الناشئين ههههه اسمحلى اسميهم نائشين
على فكره انا بحترم بعض الصحفين طبعا مش معني كده انى بستهين بيهم كلهم لأن زي ماحنا ما عارفين ان كل حاجه بيبقي فيها استثناء
وشكرا يا اسد بيه على الصور المبهره دي
Comment by Shams — May 28, 2007 @ 10:19 pm
الامر الذي دفع د.خالد منتصر في مقال بالدستور إلى التساؤل عما كانت الأهرام ستفعله إذا كانت الأخت عضوة نشطة بلجنة السياسات مثلاً ؟!!
فعلاً
تحياتي
Comment by صاحب البوابة — May 28, 2007 @ 10:34 pm
يا جيمي هوود
مع عدم احترامي للي إنت كاتبه مش قضيتي خالص تفاصيل القضية والاتهام الموجه للشخصية المعنية
المشكلة هي التغطية غير المهنية والحقيرة اللي ربطت بين الاتهام وبين حركة كفاية وده عمل لا يمت للصحافة بصلة و ردح شوارع
الانتماء السياسي مالوش أي علاقة ومفيش أي مبرر لذكره في تغطية خبر زي ده , وفيه مئات القضايا المشابهة في أقسام الشرطة كل يوم ما بتتنشرش لأنها ليست أخبار تستحق النشر
حضرتك مثلاً لو ليك علاقات نسائية غير قانونية واتمسكت في قضية آداب هيبقى مهني ومحترم إن حد يكتب القبض على مدون وعضو بحركة كفاية ارتكب فعلا فاضحاً ؟
Comment by asad — May 29, 2007 @ 2:23 am
في حاجة كمان: سهل جدا صحيفو تنشر خبر مبني على واقعة حقيقية و يضيف فيه الصحفي/المخبر أن المتهم أو المضبوط عضو في تنظيمات و منظمات و أحزاب و هو أساسا ما يعرفش “كفاية” دي يعني إيه!
دا غير طبعا احتمال أن ما يكونش فيه خبر من أساسه.
Comment by ألِف — May 29, 2007 @ 12:53 pm
ياحلويين يا مدونيين يا ذكوريييين
يا مثقفين يا جامديين ياللي كلامك كله حجم ومواعظ ومفيهوش غلطه
شفتو في مدونه واحده فينا بتتكلم عن لون فستان هيفا
ولا لون شعر نانسي الجديد
عموماا لو هيا صحيح حمله كلنا نسوان زي ماانتو بتقولو
لو هيا هيفا يبقي فاقعه مرارتكم ليييه
وخانقاكم ليه ومفروسين منها
Comment by shaimaa — June 2, 2007 @ 12:30 am
والله يامصريون الله يعينكم بس لازم تقفوا وقفة رجل واحد امام اعداءكم الداخلين لانكم مظلومين
Comment by محمد — August 14, 2007 @ 11:55 am